ប្រមាណអំឡុងឆ្នាំ ៣០-២០០ នៃគ.ស. តាមរយៈប្រព័ន្ធច្បាប់សកល និងការគ្រប់គ្រងរបស់អាណាចក្ររ៉ូម ការធ្វើដំណើរមានសុវត្ថិភាព ហេតុដូច្នេះហើយបានជាដំណឹងល្អរីកសាយយ៉ាងខ្លាំងនៅពីរបីសតវត្សដំបូង។ ជាដំបូង ទីក្រុងកណ្ដាលនៃគ្រីស្ទសាសនាគឺក្រុងយេរូសាឡឹម និងស្រុកស៊ីរី ប៉ុន្តែមិនយូរប៉ុន្មានគ្រីស្ទសាសនាក៏បានរីកសាយចេញទៅស្រុកអាស៊ី ក្រុងអាខៃ រហូតដល់ប្រទេសរ៉ូម។ ទោះបើមានការបៀតបៀននៅសតវត្សទី២ នៃគ.ស. ក៏ដោយ ក៏គ្រីស្ទសាសនានៅបន្តរីកសាយភាយដល់ស្រុកឆ្ងាយៗដែលមានដូចជា៖ អេស្ប៉ាញ ហ្គលលីអា និងអាហ្វ្រិកខាងជើង។ ហើយមិនយូរមិនឆាប់ សូម្បីតែមេដឹកនាំប្រទេសរ៉ូមក៏ទទួលស្គាល់គ្រីស្ទសាសនាជាសាសនាសម្រាប់អាណាចក្ររ៉ូមទាំងមូល ហើយថែមទាំងឧបត្ថម្ភព័ន្ធកិច្ចមួយចំនួនជាច្រើនទៀតផង។
