ប្រមាណអំឡុងឆ្នាំ៧៦៧-៧៥៣ មុនគ.ស. (២ពង្សាវតារក្សត្រ ១៤:២១-១៥:៧; ២របាក្សត្រ ២៦:១-៨) ពួកអាសសើុរបានបំបាក់អំណាចពួកស៊ីរីក្នុងការវាយប្រហារ ហើយពេលដែលពួកអាសសើុរចាកចេញ ការនោះបានបណ្ដាលឲ្យស្ដេច យេរ៉ូបោម ទី២ នៃសាសន៍អ៊ីស្រាអែល និងស្ដេច អូសៀស (ពេលខ្លះគេហៅទ្រង់ថាស្ដេច អ៊ូស៊ីយ៉ា) ឆក់ឱកាសនោះ ដោយវាយដណ្ដើមយកទឹកដីដែលធ្លាប់ជាកម្មសិទ្ធិនៃនគររបស់ពួកគេវិញ។ ស្ដេច យេរ៉ូបោម បានយកទីក្រុងនៅកាឡាតបានវិញជាច្រើន ហើយស្ដេច អ៊ូស៊ីយ៉ា បានយកអេឡាតរហូតដល់សមុទ្រក្រហម។ ស្ដេច យេរ៉ូបោម ក៏បានបង្ក្រាបពួកស៊ីរីអស់មួយរយៈពេលដែរ ហើយស្ដេច យេរ៉ូបោម ក៏បានវាយយកទីក្រុងខ្លះៗនៅភីលីស្ទីន ក៏ដូចជាទៅច្បាំងនឹងពួកអារ៉ាប់នៅស្រុកគើរ-បាល ហើយក៏ច្បាំងជាមួយពួកម៉ាអូនផងដែរ។