នៅឆ្នាំ ៦២៨-៦០៩ មុនគ.ស. (២ពង្សាវតារក្សត្រ ២២:១-២៣:៣០; ២របាក្សត្រ ៣៤-៣៥) ក្នុងគ្រាដំបូងៗនៃការសោយរាជ្យរបស់ស្ដេច យ៉ូសៀស ទ្រង់បានព្យាយាមបំបាត់ចោលនូវការថ្វាយបង្គំព្រះក្លែងក្លាយនៅស្រុកយូដា និងនៅក្នុងទឹកដីដែលពួកគេបានវាយយក ហើយទ្រង់ក៏បានព្យាយាមជួសជុលព្រះវិហារនៃព្រះជាម្ចាស់នៅក្រុងយេរូសាឡឹមសារឡើងវិញផងដែរ។ ស្របពេលជាមួយគ្នានោះដែរ ការធ្លាក់ចុះនៃអំណាចពួកអាសស៊ើរបានបណ្ដាលឲ្យទ្រង់បន្ថែមទឹកដីចូលនគររបស់ទ្រង់ដែរ។ ស្ដេច យ៉ូសៀស ស្លាប់នៅមេគីដោ ពេលដែលទ្រង់ព្យាយាមរារាំងផារ៉ោន-នេកោ ទី២ នៃស្រុកអេស៊ីព្ទកុំឲ្យទៅកើកេមីស ដើម្បីជួយពួកអាសស៊ើរ ដែលកំពុងទទួលការវាយប្រហារពីពួកបាប៊ីឡូន។