នៅឆ្នាំ ៥៨៦ មុនគ.ស. (២ពង្សាវតារក្សត្រ ២៥:២២-២៦; យេរេមា ៤០-៤១) ក្រោយពីការដកសាសន៍យូដាស្ទើរទាំងអស់ លើកលែងតែអ្នកក្រីក្រ សាសន៍បាប៊ីឡូនបានតែងតាំងរដ្ឋាភិបាលថ្មីនៅស្រុកមីសប៉ា ដោយលើកកេដាលាធ្វើជាអ្នកគ្រប់គ្រង។ ក្នុងចំណោមមេទ័ពរបស់ស្ដេច កេដាលា មានលោក អុីសម៉ាអែល ដែលជាពូជពង្សស្ដេចខ្សែសាសន៍យូដា។ ស្ដេច ប្អាលីស ដែលជាស្ដេចពួកអាំម៉ូនបានចាក់រុកឲ្យលោក អុីសម៉ាអែល ទៅសម្លាប់ស្ដេច កេដាលា នៅស្រុកមីសប៉ា។ បន្ទាប់មក លោក អុីសម៉ាអែល ក៏បានសម្លាប់អ្នកធ្វើធម្មយាត្រានៅស្រុកស៊ីគែម ស្រុកស៊ីឡូរ និងស្រុកសាម៉ារី ហើយក៏បានចាប់មនុស្សមួយចំនួនយកធ្វើជាឈ្លើយនៅគីបៀន។ មានអ្នកដឹកនាំម្នាក់ទៀតឈ្មោះ យ៉ូហាណាន បានដេញតាមលោក អុីសម៉ាអែល នៅស្រុកគីបៀន ហើយបានដោះលែងពួកឈ្លើយ ប៉ុន្តែលោក អុីសម៉ាអែល បានរត់គេចភៀសខ្លួនទៅឯស្រុកអាំម៉ូន។ ដោយមានការភ័យខ្លាចថា តើសាសន៍បាប៊ីឡូននឹងធ្វើអ្វីអាក្រក់ដាក់ពួកគេ ដើម្បីសងសឹកការសម្លាប់ស្ដេច កេដាលា ពួកឈ្លើយជាច្រើនដែលបានទទួលសេរីភាពបានភៀសខ្លួនរត់ទៅស្រុកអេស៊ីព្ទ។